សម្តេចធិបតី ហ៊ុន ម៉ាណែត ចេញអនុក្រឹត្យកំណត់ទម្រង់ លក្ខណៈសម្គាល់ ព័ត៌មាន និងគោលការណ៍នៃអត្តសញ្ញាណបណ្ណសញ្ជាតិខ្មែរ

សម្តេចធិបតី ហ៊ុន ម៉ាណែត ចេញអនុក្រឹត្យកំណត់ទម្រង់ លក្ខណៈសម្គាល់ ព័ត៌មាន និងគោលការណ៍នៃអត្តសញ្ញាណបណ្ណសញ្ជាតិខ្មែរ

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅថ្ងៃទី១ ខែមេសា ឆ្នាំ២០២៥ បានចេញអនុក្រឹត្យ ស្តីពីអត្តសញ្ញាណបណ្ណសញ្ជាតិខ្មែរ។ ដោយអនុក្រឹត្យនេះមានបំណង កំណត់អំពីទម្រង់ និងព័ត៌មានដែលមាននៅក្នុងបញ្ជីអត្តសញ្ញាណបណ្ណសញ្ជាតិខ្មែរ និង ទម្រង់ លក្ខណៈសម្គាល់ ព័ត៌មាន ការកំណត់សុពលភាព និងការកំណត់អាយុត្រូវផ្តល់អត្តសញ្ញាណបណ្ណ សញ្ជាតិខ្មែរ ក្នុងគោលបំណងដើម្បីធានាការ ចុះបញ្ជីអត្តសញ្ញាណបណ្ណសញ្ជាតិខ្មែរឱ្យបានត្រឹមត្រូវ ស្របតាម គោលការណ៍កំណត់នៅក្នុងច្បាប់ស្តីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម។

តាមរយៈអនុក្រឹត្យនេះបានឱ្យដឹងថា ព័ត៌មានបុគ្គលក្នុងបញ្ជីអត្ដសញ្ញាណបណ្ណសញ្ជាតិខ្មែរត្រូវមានដូចជា៖ ១, លេខកូដសម្គាល់អត្ដសញ្ញាណបុគ្គលរបស់សាមីខ្លួន(បើមាន)។ ២, លេខអត្ដសញ្ញាណបណ្ណសញ្ជាតិខ្មែរ។ ៣, ព័ត៌មានជីវប្រវត្ដិរបស់សាមីខ្លួន ដូចជាឈ្មោះខ្មែរ និងឡាតាំង កម្ពស់ ភេទ ថ្ងៃខែឆ្នាំកំណើត ទីកន្លែងកំណើត ស្ថានភាពសញ្ជាតិខ្មែរ អាស្រ័យដ្ឋានបច្ចុប្បន្ន លេខទូរស័ព្ទ និងឈ្មោះឪពុកម្ដាយជាដើម។ ៤, ព័ត៌មានជីវមាត្រ ដែលមានដូចជា រូបថតឌីជីថល ស្នាមខ្ចៅដៃ ស្នាមស្គែនប្រស្រីភ្នែក(បើមាន) និងហត្ថលេខាអេឡិចត្រូនិច។ និង៥ ព័ត៌មានអំពីការផ្ដល់ និងការគ្រប់គ្រងការផ្ដល់អត្ដសញ្ញាណបណ្ណសញ្ជាតិខ្មែរ។

បន្ថែមពីនេះ សម្រាប់អត្ដសញ្ញាណបណ្ណសញ្ជាតិខ្មែរ ត្រូវមានទម្រង់ជាសន្លឹកប្លាស្ទិក ឬធាតុផ្សំអំពីសារធាតុគីមីសំយោគផ្សេងទៀត ឬជាទម្រង់អាឡិចត្រូនិច។

សូមជម្រាបជូនថា សន្លឹកអត្ដសញ្ញាណបណ្ណសញ្ជាតិខ្មែរ មានលក្ខណៈសម្គាល់ និងសុវត្ថិភាពពិសេសដោយបង្កប់បន្ទះឈីបអេឡិចត្រូនិក ឬកូដឆ្លើយតបរហ័សដែលមានផ្ទុកព័ត៌មានសំខាន់ៗលើអត្ដសញ្ញាណបណ្ណសញ្ជាតិខ្មែរ៕