អ្នកនាំពាក្យក្រសួងការបរទេស៖ ឯកអគ្គរាជទូតកម្ពុជាប្រចាំសហរដ្ឋអាមេរិកបានជម្រាបឧបការីរងក្រសួងការបរទេសសហរដ្ឋអាមេរិកអំពីគោលជំហររបស់កម្ពុជានិងការវិវឌ្ឍន៍ពាក់ព័ន្ធជម្លោះព្រំដែនកម្ពុជា-ថៃ
អ្នកនាំពាក្យក្រសួងការបរទេស៖ ឯកអគ្គរាជទូតកម្ពុជាប្រចាំសហរដ្ឋអាមេរិកបានជម្រាបឧបការីរងក្រសួងការបរទេសសហរដ្ឋអាមេរិកអំពីគោលជំហររបស់កម្ពុជានិងការវិវឌ្ឍន៍ពាក់ព័ន្ធជម្លោះព្រំដែនកម្ពុជា-ថៃ
ថ្លែងនៅក្នុងឱកាសធ្វើសេចក្តីសង្ខេបព័ត៌មានប្រចាំថ្ងៃស្ដីពី«លទ្ធផលនៃការអនុវត្តបទឈប់បាញ់រវាងកម្ពុជា-ថៃ» ដែលធ្វើនៅទីស្តីការគណៈរដ្ឋមន្ត្រី នៅរសៀលថ្ងៃទី៣០ ខែសីហា ឆ្នាំ២០២៥ ឯកឧត្តម ជុំ សុន្ទរី អ្នកនាំពាក្យក្រសួងការបរទេស បានថ្លែងថា នៅក្នុងកិច្ចជំនួបពិភាក្សាការងារតាមទូរស័ព្ទរវាងឯកឧត្ដម កុយ គួង ឯកអគ្គរដ្ឋទូតកម្ពុជាប្រចាំសហរដ្ឋអាមេរិក ជាមួយឯកឧត្តម Hunt Vandertoll ឧបការីរងទទួលបន្ទុកកិច្ចការអាស៊ីបូព៌ានិងប៉ាស៊ីហ្វិកនៃក្រសួងការបរទេសសហរដ្ឋអាមេរិក នៅថ្ងៃទី២៨ ខែសីហា ឆ្នាំ២០២៥ អំពីការវិវឌ្ឍន៍ពាក់ព័ន្ធនឹងជម្លោះព្រំដែនកម្ពុជា-ថៃ។
ឯកឧត្តម ជុំ សុន្ទរី បានថ្លែងបន្តថា នៅក្នុងជំនួបនោះផងដែរ ឯកឧត្តមឯកអគ្គរាជទូត កុយ គួង បានរំឭកអំពីលិខិតដ៏មានអត្ថន័យរបស់ឯកឧត្តម ដូណាល់ ត្រាំ ប្រធានាធិបតីសហរដ្ឋអាមេរិកផ្ញើជូនចំពោះសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលឆ្លុះបញ្ចាំងអំពីការចូលរួមរបស់ឯកឧត្តម ក្នុងការធ្វើឲ្យមានបទឈប់បាញ់ជាបន្ទាន់រវាងកងទ័ពកម្ពុជា-ថៃ និងបានជួយសង្គ្រោះជីវិតមនុស្សជាច្រើននាក់ ដែលស្របទៅនឹងអ្វីដែលឯកឧត្តម ចង់បានដូចគ្នា ព្រមទាំងបានធ្វើការបកស្រាយបំភ្លឺបដិសេធនូវការចោទប្រកាន់របស់ថៃ គឺកម្ពុជាមិនប្រើប្រជាជនស៊ីវិលធ្វើជារបាំងខែល និងមិនបានដាក់មីនថ្មីនោះទេ។
ទន្ទឹមនោះផងដែរ ឯកឧត្តម កុយ គួង ក៏បានអំពាវនាវឲ្យសហគមន៍អន្តរជាតិជួយអន្តរាគមន៍ឲ្យភាគីថៃដោះលែងយោធិនខ្មែរចំនួន១៨រូប ដោយយោធាថៃបានប្រើល្បិចចាប់ខ្លួនជាចំណាប់ខ្មាំង នៅក្រោយការចូលជាធរមាននៃកិច្ចព្រមព្រៀងបទឈប់បាញ់ នៅថ្ងៃទី២៨ ខែកក្កដា ឆ្នាំ២០២៥។ ឯកឧត្តមអគ្គរាជទូតកម្ពុជា ក៏បានលើកឡើងសាជាថ្មី អំពីជំហររបស់រាជរដ្ឋាភិបាលកម្ពុជាក្នុងការដោះស្រាយជម្លោះព្រំដែនជាមួយប្រទេសជិតខាងដោយសន្តិវិធី ស្របតាមច្បាប់អន្តរជាតិ ជាមួយនឹងការប្ដេជ្ញាចិត្តលើកកម្ពស់កិច្ចសហប្រតិបត្តិការលើគ្រប់វិស័យជាមួយភាគីអាមេរិកឱ្យកាន់តែប្រសើរបន្ថែមទៀត។
នាឱកាសនោះផងដែរ ឯកឧត្តមជុំ សុន្ទរី បានថ្លែងបញ្ជាក់ថា ឯកឧត្តមឧបការីរងក្រសួងការបរទេសសហរដ្ឋអាមេរិក ក៏បានលើកឡើងអំពីការគាំទ្ររបស់ប្រធានាធិបតីសហរដ្ឋអាមេរិក ចំពោះការស្វែងរកដំណោះស្រាយបញ្ចប់ជម្លោះព្រំដែនដោយសន្តិវិធី និងជំរុញឲ្យភាគីទាំងពីរកម្ពុជា-ថៃ បន្តកិច្ចសន្ទនាដោយស្មោះត្រង់ និងបង្កើតក្រុមអ្នកសង្កេតការណ៍របស់អាស៊ានឲ្យបានឆាប់ដើម្បីតាមដាននិងត្រួតពិនិត្យការអនុវត្តបទឈប់បាញ់ឲ្យមានប្រសិទ្ធភាព។ ឯកឧត្តមឧបការីរងសហរដ្ឋអាមេរិក សង្ឃឹមថាភាគីទាំងពីរកម្ពុជា-ថៃ នឹងជៀសវាងសកម្មភាពដែលអាចនាំឱ្យស្ថានភាពនៅតាមព្រំដែនឡើងកំដៅ និងមានភាពតានតឹងឡើងវិញ ហើយសហរដ្ឋអាមេរិកត្រៀមខ្លួនជាស្រេចក្នុងការពង្រឹងពង្រីកកិច្ចសហប្រតិបត្តិការទ្វេភាគីកម្ពុជា-អាមេរិក៕
