កម្លាំងនៃយោធភូមិភាគទី៥ ចុះអន្តរាគមន៍ភ្លាមៗបន្ទាប់ពីផ្ទះពលរដ្ឋជាច្រើនខ្នង ត្រូវបានខូចខាត ដោយសារខ្យល់កន្រ្តាក់
កម្លាំងនៃយោធភូមិភាគទី៥ ចុះអន្តរាគមន៍ភ្លាមៗបន្ទាប់ពីផ្ទះពលរដ្ឋជាច្រើនខ្នង ត្រូវបានខូចខាត ដោយសារខ្យល់កន្រ្តាក់
ក្រោយផ្ទះរបស់បងប្អូនប្រជាពលរដ្ឋនៅស្រុកមួយចំនួននៃខេត្តបន្ទាយមានជ័យ ជាច្រើនខ្នងត្រូវបានប៉ើងដំបូល កាលពីរសៀលថ្ងៃទី៥ឧសភាម្សិលមិញ ដោយសារតែមានភ្លៀង និងលាយឡំជាមួយខ្យល់កន្ត្រាក់ផងនោះ កងកម្លាំងរបស់យោធភូមិភាគទី៥ បានចុះអន្តរាគមន៍ភ្លាមៗ រួមទាំងនាំយកសង្ក័សីរាប់រយសន្លឹកទៅជួយពួកគាត់ផងដែរ។
ឧត្តមសេនីយ៍ទោ សេង ធារិន មេបញ្ជាការរងនិងជានាយសេនាធិការយោធភូមិភាគទី៥ បានប្រាប់ ទូរទស្សន៍BTV នាព្រឹកថ្ងៃទី៦ ខែឧសភា ឆ្នាំ២០២៤នេះថា មានផ្ទះបងប្អូនរាប់សិបខ្នងបានប៉ើងដំបូល និងផ្ទះខ្លះបានដួលរំលំទាំងស្រុង។ ភ្លាមៗបន្ទាប់ពីជួបគ្រោះធម្មជាតិនេះ លោកឧត្តមសេនីយ៍បានណែនាំឲ្យកម្លាំងជំនួយសេនាធិការវរសេនាតូចថ្មើជើងលេខ៥១៤ ដឹកនាំកម្លាំងចំនួន១០០នាក់ រថយន្តពីរគ្រឿង រួមជាមួយនឹងសង្ក័សីចំនួន៤០០សន្លឹក ចុះជួយរុះរើផ្ទះ ធ្វើផ្ទះពលរដ្ឋដែលរងការខូចខាត ដោយខ្យល់ កន្ត្រាក់នេះ។ លោកបញ្ជាក់បន្ថែមទៀតថា គ្រាន់តែរបាយការណ៍បឋមនៅស្រុកថ្មពួកទាំងមូលគឺមានផ្ទះ ពលរដ្ឋចំនួន៥០ខ្នងដែលត្រូវបានរងផលប៉ះពាល់ និងស្រុកមួយចំនួនទៀតផងដែរ។
បើតាមលោកឧត្តមសេនីយ៍ សេង ធារិន បានបញ្ជាក់ផងដែរថា សង្ក័សី ដែលបានប្រគល់ជូនដល់ ពលរដ្ឋរងគ្រោះដោយសារខ្យល់ព្យុះ និងខ្យល់កន្ត្រាក់នេះ គឺជាអំណោយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត៕
ប្រភពព័ត៌មាន ៖ BTV News