រដ្ឋបាលរាជធានីភ្នំពេញ ណែនាំឱ្យពង្រឹងសន្តិសុខ សុខសុវត្ថិភាព និងសណ្តាប់ធ្នាប់សាធារណៈល្អប្រសើរ ក្នុងឱកាសពិធីបុណ្យចូលឆ្នាំថ្មី ប្រពៃណីជាតិ

រដ្ឋបាលរាជធានីភ្នំពេញ ណែនាំឱ្យពង្រឹងសន្តិសុខ សុខសុវត្ថិភាព និងសណ្តាប់ធ្នាប់សាធារណៈល្អប្រសើរ ក្នុងឱកាសពិធីបុណ្យចូលឆ្នាំថ្មី ប្រពៃណីជាតិ

រដ្ឋបាលរាជធានីភ្នំពេញ បានចេញសេចក្តីណែនាំដល់ស្នងការដ្ឋាននគរបាលរាជធានីភ្នំពេញ បញ្ជាការដ្ឋានកងរាជអាវុធហត្ថរាជធានីភ្នំពេញ បញ្ជាការដ្ឋានយោធភូមិភាគពិសេស រដ្ឋបាលខណ្ឌទាំង១៤ រដ្ឋបាលសង្កាត់ទាំង១០៥ និងមន្ទីរ-អង្គភាពជំនាញជុំវិញ រដ្ឋបាលរាជធានីភ្នំពេញ ត្រូវធានាឱ្យបាននូវសន្តិសុខ សុវត្ថិភាព និងសណ្តាប់ធ្នាប់សាធារណៈល្អប្រសើរ ព្រមទាំងបង្កើនសោភ័ណភាពរាជធានីភ្នំពេញ ឱ្យកាន់តែស្រស់ស្អាត នៅក្នុងឱកាសប្រារព្ធពិធីបុណ្យចូលឆ្នាំប្រពៃណីជាតិ ឆ្នាំម្សាញ់ សប្តស័ក ព.ស ២៥៦៩ គ.ស.២០២៥ នាពេលខាងមុខនេះ ឱ្យប្រព្រឹត្តទៅដោយអធិកអធម ដើម្បីរក្សាបាននូវប្រពៃណីទំនៀមទម្លាប់វប្បធម៌ដ៏ល្អផូរផង់របស់ជាតិ ផ្តល់ភាពសប្បាយរីករាយជូនបងប្អូនប្រជាពលរដ្ឋ។

យោងតាមសេចក្តីណែនាំរបស់រដ្ឋបាលរាជធានីភ្នំពេញ ចុះថ្ងៃទី ០២ ខែមេសា ឆ្នាំ២០២៥ បានឱ្យដឹងថា រដ្ឋបាលខណ្ឌទាំង ១៤ និងគ្រប់មន្ទីរ-អង្គភាពជំនាញជុំវិញរដ្ឋបាលរាជធានីភ្នំពេញ ត្រូវពង្រឹងការងារមួយចំនួន រួមមាន៖
1- ត្រូវចាត់តាំងឱ្យមានក្រុមវេនយាមប្រចាំការ ២៤ម៉ោង នៅតាមអង្គភាពរៀងៗខ្លួន ដើម្បីត្រៀមដោះស្រាយរាល់ការងារដែលចាំបាច់។ ចំពោះបញ្ជីឈ្មោះក្រុមវេនយាមប្រចាំការ ត្រូវផ្ញើមករដ្ឋបាលរាជធានីភ្នំពេញ ឱ្យបានយ៉ាងយូរបំផុតត្រឹមថ្ងៃទី០៨ ខែមេសា ឆ្នាំ២០២៥
2- រៀបចំកម្មវិធីចុះសួរសុខទុក្ខបងប្អូនប្រជាពលរដ្ឋក្រីក្រនៅតាមសហគមន៍ មណ្ឌលកុមារកំព្រា មណ្ឌលចាស់ជរា-ជនពិការ មន្ទីរពេទ្យ និងមណ្ឌលនានា
3- សហការជាមួយមន្ទីរធម្មការ និងសាសនារាជធានីភ្នំពេញ និងគណៈកម្មការអាចារ្យវត្ត ដើម្បីបង្កលក្ខណៈងាយស្រួលជូនបងប្អូនប្រជាពលរដ្ឋពុទ្ធបរិស័ទ បានបំពេញកុសលតាមសទ្ធាជ្រះថ្លា និងរៀបចំពិធីតាមទំនៀមទម្លាប់ប្រពៃណី និងសាសនារបស់ជាតិ ព្រមទាំងត្រៀមចាត់កម្លាំងការពារសន្តិសុខ សុវត្ថិភាព និងសណ្តាប់ធ្នាប់សាធារណៈនៅតាមវត្តអារាមនីមួយៗ ជាពិសេស ជួយសម្រួលចរាចរណ៍យានយន្តពុទ្ធបរិស័ទចូលក្នុងបរិវេណវត្តអារាម ឱ្យបានឆាប់រហ័ស ចៀសវាងការកកស្ទះចរាចរណ៍នៅតាមដងផ្លូវមុខវត្តអារាម និងរៀបចំចំណតយានយន្តនៅតាមវត្តអារាម ឱ្យបានសមរម្យ
4- សហការជាមួយមន្ទីរបរិស្ថានរាជធានីភ្នំពេញ មន្ទីរសាធារណការ និងដឹកជញ្ជូនរាជធានីភ្នំពេញ និងក្រុមហ៊ុនប្រមូល សម្អាត និងដឹកជញ្ជូនសំរាម ឱ្យបង្កើនការបោសសម្អាត ប្រមូល និងដឹកជញ្ជូនសំរាមចេញពីរាជធានីភ្នំពេញ ឱ្យទាន់ពេលវេលា ដើម្បីធានាបាននូវបរិស្ថាន និងអនាម័យស្អាតកំណត់ទីតាំងសមរម្យ ដើម្បីរៀបចំសង្ក្រាន្តនៅតាមមូលដ្ឋានរបស់ខ្លួន និងធ្វើការផ្សព្វផ្សាយឱ្យបានទូលំទូលាយពីការរៀបចំសង្ក្រាន្តផ្សព្វផ្សាយ និងណែនាំដល់គេហដ្ឋានបងប្អូនប្រជាពលរដ្ឋ និងគ្រប់មូលដ្ឋានទីតាំងអាជីវកម្មទាំងអស់ត្រូវចូលរួមអនុវត្តឱ្យបានល្អប្រសើរ។