សម្ដេចតេជោ ហ៊ុន សែន ស្វាគមន៍ឯកឧត្តម U Khin Yi ប្រធានគណបក្ស សហភាពសាមគ្គី និងអភិវឌ្ឍន៍មីយ៉ាន់ម៉ា ចូលជួបសម្តែងការគួរសម

សម្ដេចតេជោ ហ៊ុន សែន ស្វាគមន៍ឯកឧត្តម U Khin Yi ប្រធានគណបក្ស សហភាពសាមគ្គី និងអភិវឌ្ឍន៍មីយ៉ាន់ម៉ា ចូលជួបសម្តែងការគួរសម

នៅល្ងាចថ្ងៃព្រហស្បតិ៍ ទី២៨ ខែសីហា ឆ្នាំ២០២៥ សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី និងជាប្រធានគណបក្សប្រជាជនកម្ពុជា បានទទួលស្វាគមន៍ឯកឧត្តម U Khin Yi ប្រធានគណបក្សសហភាពសាមគ្គី និងអភិវឌ្ឍន៍មីយ៉ាន់ម៉ា (USDP) ចូលជួបសម្តែងការគួរសម និងពិភាក្សាការងារ នៅវិមាន៧មករា រាជធានីភ្នំពេញ។
ជាកិច្ចចាប់ផ្តើម សម្ដេចតេជោ ហ៊ុន សែន បានស្វាគមន៍យ៉ាងកក់ក្តៅចំពោះឯកឧត្តម U Khin Yi និងគណៈប្រតិភូទាំងអស់ ដែលបានអញ្ជើញមកបំពេញទស្សនកិច្ចនៅកម្ពុជាជាលើកទី២ បន្ទាប់ពីការមកចូលរួមកិច្ចប្រជុំ ICAPP លើកទី១២ នៅរាជធានីភ្នំពេញ កាលពីឆ្នាំ២០២៤កន្លងទៅ។ សម្តេចបានបន្តលើកឡើងថា ដំណើរទស្សនកិច្ចរបស់ឯកឧត្តម U Khin Yi លើកនេះ មានលក្ខណៈពិសេស ដោយសារវានឹងរួមចំណែកពង្រឹងទំនាក់ទំនងរវាងគណបក្ស និងគណបក្ស។
នាឱកាសជំនួបនេះ ឯកឧត្តម U Khin Yi បានថ្លែងអំណរគុណយ៉ាងជ្រាលជ្រៅ និងជាកិត្តិយសធំធេង ដែល បានជួបសម្តេច ជាថ្មីម្តងទៀត។ ឯកឧត្តម បានលើកឡើងថា ឯកឧត្តមតែងតែព្យាយាមរកឱកាស ដើម្បីពង្រឹងទំនាក់ទំនងជាមួយសម្តេច ដែលជាថ្នាក់ដឹកនាំពោរពេញទៅដោយបទពិសោធ និងបានដឹកនាំអភិវឌ្ឍ ប្រទេស និងគណបក្ស។ ជាមួយគ្នានេះ ឯកឧត្តមក៏បានវាយតម្លៃខ្ពស់ចំពោះគណបក្សប្រជាជនកម្ពុជា ដែលជាគណបក្សសម្បូរទៅដោយធនធានមនុស្ស និងជាមួយគ្នានេះ បានបញ្ជាក់ពីការត្រៀមលក្ខណៈក្នុងការពង្រឹងទំនាក់ទំនង និងកិច្ចសហប្រតិបត្តិការរវាងគណបក្សទាំងពីរ រួមទាំងរវាងយុវជន និងយុវជនផងដែរ។
ឆ្លៀតនៅក្នុងឱកាសនោះ ឯកឧត្តម U Khin Yi បានជម្រាបជូនអំពីការវិវត្ដសភាពការណ៍ និងគម្រោងនៃការរៀបចំការបោះឆ្នោតនៅមីយ៉ាន់ម៉ា នៅចុងឆ្នំា២០២៥នេះ ព្រមទាំង គោរពអញ្ជើញ សម្តេចតេជោ បំពេញទស្សនកិច្ចសាជាថ្មី នៅមីយ៉ាន់ម៉ា នៅពេលសមស្របខាងមុខ។
ជាការឆ្លើយតប សម្តេចតេជោ បានលើកឡើងថា ឆ្នាំ២០២៥ គឺជាខួប៧០ឆ្នាំនៃចំណងការទូតរវាងកម្ពុជា-មីយ៉ាន់ម៉ា ដែលជាទំនាក់ទំនងមួយដ៏ចាស់ទុំ។ ការចុះ MoU ពង្រឹងកិច្ចសហប្រតិបត្តិការរវាងគណបក្សទាំងពីរ នឹងរួមចំណែកពង្រឹងទំនាក់ទំនងរវាងប្រទេសទាំងពីរ បន្ថែមទៅលើក្របខណ្ឌទ្វេភាគី និងពហុភាគី ដែលភាគីទាំងពីរមាន។ នៅក្នុងស្មារតីនេះ សម្តេចតេជោបានចែករំលែកអំពីប្រវត្តិនៃការកសាងគណបក្ស ការពង្រឹងរចនាសម្ព័ន្ធរបស់គណបក្ស និងការខិតខំធ្វើសកម្មភាពរបស់គណបក្ស តាមរយៈការផ្សារភ្ជាប់ និងឆ្លើយតបទៅនឹងតម្រូវការអភិវឌ្ឍរបស់ប្រជាពលរដ្ឋ ដើម្បីបង្កើនភាពប្រៀបនៅក្នុងការប្រកួតប្រជែងបោះឆ្នោតនៅក្នុងលម្ហប្រជាធិបតេយ្យនៅកម្ពុជា។
ជាមួយគ្នានេះ សម្តេចតេជោ បានលើកឡើងអំពីការផ្ទេរអំណាចដោយជោគជ័យ បន្ទាប់ពីការបោះឆ្នោត ជូនថ្នាក់ដឹកនាំថ្មី ដែលនេះមិនត្រឹមតែជាការផ្ទេរថ្នាក់ដឹកនាំប៉ុណ្ណោះទេ ប៉ុន្តែវាជាការផ្ទេរជំនាន់ថ្នាក់ដឹកនាំនៅកម្ពុជាតែម្តង។ ដូចនេះ ការយកចិត្តទុកដាក់ទៅលើយុវជនគឺជាកិច្ចការសំខាន់។ នៅក្នុងបរិបទនេះ សម្តេចតេជោបានលើកឡើងជាអនុសាសន៍ឱ្យមីយ៉ាន់ម៉ា ខិតខំរៀបចំ ផែនទីចង្អុលផ្លូវ (Road map) ជំរុញការបោះឆ្នោតឱ្យបានលេចចេញជារូបរាង ទៅតាមផែនការ ដោយសារការសម្រេចចិត្តរបស់ប្រជាជនមីយ៉ាន់ម៉ានៅក្នុងការបោះឆ្នោត គឺកត្តាសំខាន់បំផុត។
នៅចុងបញ្ចប់ សម្តេចតេជោ បានទទួលយកការអញ្ជើញរបស់ឯកឧត្តម U Khin Yi ទៅបំពេញទស្សនកិច្ចនៅប្រទេសមីយ៉ាន់ម៉ា ក្នុងនាមប្រធានគណបក្សប្រជាជនកម្ពុជា នៅពេលខាងមុខ និង ជូនពរឯកឧត្តម U Khin Yi និងគណៈប្រតិភូ ទទួលបាននូវភាពរីករាយក្នុងការស្នាក់នៅប្រទេសកម្ពុជា។