សម្តេចធិបតី ហ៊ុន ម៉ាណែត ចេញអនុក្រឹត្សបញ្ចប់មុខតំណែងអភិបាលក្រុងកែប

សម្តេចធិបតី ហ៊ុន ម៉ាណែត ចេញអនុក្រឹត្សបញ្ចប់មុខតំណែងអភិបាលក្រុងកែប

សម្តេចធិបតី ហ៊ុន ម៉ាណែត នៅថ្ងៃទី១២ ខែមករា ឆ្នាំ២០២៤នេះ បានចេញអនុក្រឹត្យបញ្ចប់មុខតំណែង លោក ខេង យ័ន ពីគណៈអភិបាលក្រុងកែប នៃខេត្តកែប និងបានបញ្ជាក់តាមរយៈទំព័រហ្វេសប៊ុកផ្លូវការថា វិធានការនេះស្ថិតក្នុងអភិក្រមទាំង៥គឺ៖ ឆ្លុះកញ្ចក់ ងូតទឹក ដុះក្អែល ព្យាបាល និងវះកាត់ ។

សម្តេចធិបតីនាយករដ្ឋមន្ត្រី បានគូសបញ្ជាក់យ៉ាងដូច្នេះថា៖ ថ្ងៃនេះខ្ញុំមានការចាំបាច់ត្រូវអនុវត្តអភិក្រមទី៥ គឺ “ការវះកាត់” តាមរយៈការចុះហត្ថលេខា ដើម្បីបញ្ចប់មុខតំណែង របស់អភិបាលក្រុងកែប ដែលបានប្រើប្រាស់អំណាចនៃតួនាទីរបស់ខ្លួនប្រព្រឹត្តអំពើដែលនាំឲ្យប៉ះពាល់ដល់ផលប្រយោជន៍រដ្ឋ និងផលប្រយោជន៍ជាតិ។ ការសម្រេចចិត្តនេះគឺផ្អែកទៅលើមូលដ្ឋានច្បាស់លាស់ នៃការស៊ើបអង្កេតរបស់អង្គភាពប្រឆាំងអំពើពុករលួយ។
ខ្ញុំសង្ឃឹមថាមន្ត្រីទាំងអស់របស់រាជរដ្ឋាភិបាលទាំងថ្នាក់ជាតិ និងក្រោមជាតិ នឹងប្រកាន់ខ្ជាប់នូវអភិក្រមទី១ រហូតដល់ទី៤ ឲ្យបានជាប់ជាប្រចាំ ជាពិសេសក្នុងការបម្រើប្រជាពលរដ្ឋឲ្យបានល្អ និងដើម្បីជៀសវាងការឈានទៅដល់ការអនុវត្តអភិក្រមទី៥។

ទោះជាយ៉ាងណាក៏ដោយ រាជរដ្ឋាភិបាលនឹងបន្តប្រកាន់ជំហរយ៉ាងម៉ឺងម៉ាត់ក្នុងការវះកាត់(អភិក្រមទី៥) ចំពោះមន្ត្រីដែលប្រព្រឹត្តអំពើខុសឆ្គងនាំអោយប៉ះពាល់ធ្ងន់ធ្ងរដល់ផលប្រយោជន៍ជាតិនិងប្រជាជន។
គួរបញ្ជាក់ថា លោក ខេង យ័ន អភិបាលក្រុងកែប ត្រូវបានអង្គភាពប្រឆាំងអំពើពុករលួយ (ACU) ឃាត់ខ្លួនកាលពីថ្ងៃទី២ ខែមករា ឆ្នាំ២០២៤កន្លងទៅនេះ ទាក់ទិននឹងការប្រព្រឹត្តិអំពើពុករលួយ៕