សម្តេចធិបតី ហ៊ុន ម៉ាណែត ៖ «ត្រកូលហ៊ុន គ្មានបំណងណាមួយក្បត់ជាតិទេ គឺមានតែធ្វើអ្វីៗគ្រប់យ៉ាងដើម្បីផលប្រយោជន៍ជាតិ និងប្រជាជនកម្ពុជា»
សម្តេចធិបតី ហ៊ុន ម៉ាណែត ៖ «ត្រកូលហ៊ុន គ្មានបំណងណាមួយក្បត់ជាតិទេ គឺមានតែធ្វើអ្វីៗគ្រប់យ៉ាងដើម្បីផលប្រយោជន៍ជាតិ និងប្រជាជនកម្ពុជា»
សម្តេចធិបតី ហ៊ុន ម៉ាណែត បានផ្តាំទៅក្រុមប្រឆាំងដែលចូលចិត្តរិះគន់ត្រកូលហ៊ុន ដោយសម្ដេចបានសង្កត់ធ្ងន់ថា «ត្រកូលហ៊ុន គ្មានបំណងណាមួយក្បត់ជាតិនោះទេ គឺមានតែធ្វើអ្វីៗគ្រប់យ៉ាងដើម្បីជាតិ និងដើម្បីផលប្រយោជន៍ប្រជាជនកម្ពុជា»។
សម្តេចធិបតីបានថ្លែងដូចនេះនៅរសៀលថ្ងៃទី៨ ខែកុម្ភៈ ឆ្នាំ២០២៤ ក្នុងឱកាសដែលសម្ដេចអញ្ជើញជាអធិបតី «បិទសន្និបាតបូកសរុបការងារ ឆ្នាំ២០២៣ និងលើកទិសដៅការងារបន្ត ឆ្នាំ២០២៤ របស់ក្រសួងការងារ និងបណ្តុះបណ្តាលវិជ្ជាជីវៈ និងប្រកាសដាក់ឱ្យអនុវត្តផែនការយុទ្ធសាស្ត្រអភិវឌ្ឍន៍វិស័យការងារ សន្តិសុខសង្គម និងបណ្ដុះបណ្ដាលវិជ្ជាជីវៈ ឆ្នាំ២០២៤-២០២៨»។
សម្តេចធិបតី ហ៊ុន ម៉ាណែត បានរំលឹកផងដែរថា សម្តេចតេជោ ហ៊ុន សែន បានចំណាយពេលវេលាក្នុងការចរចាបោះបង្គោលព្រំដែនដើម្បីកុំឱ្យកូនខ្មែរជំនាន់ក្រោយ ឈ្លោះគ្នាជាមួយប្រទេសជិតខាង ដែលអាចបង្កជាសង្រ្គាមទៅថ្ងៃអនាគត។
សម្តេចធិបតី ហ៊ុន ម៉ាណែត ក៏បានចោទសួរទៅក្រុមប្រឆាំងវិញ ថាតើការដោះស្រាយបញ្ចប់បញ្ហាព្រំដែនដើម្បីកុំឱ្យមានសង្រ្គាមឈ្លោះគ្នា គឺជាអំពើក្បត់ជាតិមែនឬទេ។ សម្តេចធិបតី បានបន្តថា ការចរចាក្នុងការអភិវឌ្ឍរួមគ្នាដើម្បីទាញយកប្រេង គឺដើម្បីធានាផលប្រយោជន៍រយៈពេលវែង ដើម្បីធ្វើការអភិវឌ្ឍជាតិ និងសន្តិសុខថាមពល៕
