អ្នកនាំពាក្យក្រសួងការបរទេស៖ ឯកឧត្តម កែវ ឈា ឯកអគ្គរាជទូតនិងជាតំណាងអចិន្ត្រៃយ៍កម្ពុជាប្រចាំ(UN) បានជម្រាបឯកឧត្តម António Guterres អគ្គលេខាធិការ(UN) អំពីបច្ចុប្បន្នភាពនៃជម្លោះព្រំដែនកម្ពុជា-ថៃ

អ្នកនាំពាក្យក្រសួងការបរទេស៖ ឯកឧត្តម កែវ ឈា ឯកអគ្គរាជទូតនិងជាតំណាងអចិន្ត្រៃយ៍កម្ពុជាប្រចាំ(UN) បានជម្រាបឯកឧត្តម António Guterres អគ្គលេខាធិការ(UN) អំពីបច្ចុប្បន្នភាពនៃជម្លោះព្រំដែនកម្ពុជា-ថៃ

ថ្លែងនៅក្នុងឱកាសធ្វើសេចក្តីសង្ខេបព័ត៌មានប្រចាំថ្ងៃស្ដីពី«លទ្ធផលនៃការអនុវត្តបទឈប់បាញ់រវាងកម្ពុជា-ថៃ» ដែលធ្វើនៅទីស្តីការគណៈរដ្ឋមន្ត្រី នៅរសៀលថ្ងៃទី២៩ ខែសីហា ឆ្នាំ២០២៥ ឯកឧត្តម ជុំ សុន្ទរី អ្នកនាំពាក្យក្រសួងការបរទេស បានថ្លែងអំពីជំនួបពិភាក្សាការងាររបស់ឯកឧត្តម កែវ ឈា ឯកអគ្គរាជទូត និងជាតំណាងអចិន្ត្រៃយ៍កម្ពុជា ប្រចាំនៅអង្គការសហប្រជាជាតិ(អ.ស.ប) ជាមួយនឹងឯកឧត្តម António Guterres អគ្គលេខាធិការអង្គការសហប្រជាជាតិ (អ.ស.ប) កាលពីថ្ងៃទី២៧ ខែសីហា ឆ្នាំ២០២៥កន្លងទៅនេះ។

ឯកឧត្តម ជុំ សុន្ទរី បានថ្លែងបន្តថា នៅក្នុងជំនួបនោះផងដែរ ឯកឧត្តម ឯកអគ្គរាជទូត និងជាតំណាងអចិន្ត្រៃយ៍កម្ពុជា បានជម្រាបជូនឯកឧត្តម អគ្គលេខាធិការអង្គការសហប្រជាជាតិ(អ.ស.ប) អំពីបច្ចុប្បន្នភាពនៃជម្លោះព្រំដែនកម្ពុជា-ថៃ ដោយបានគូសបញ្ជាក់ថា កម្ពុជាតែងតែគោរពបទឈប់បាញ់ដែលបានព្រមព្រៀងរវាងភាគីទាំងពីរ និងមានភាពអត់ធ្មត់ខ្ពស់បំផុតនៅចំពោះសកម្មភាពនៅតែបន្តរំលោភបទឈប់បាញ់ដោយទាហានថៃ និងបានសម្តែងក្តីបារម្ភយ៉ាងខ្លាំងចំពោះការទង្វើបង្កហេតុថ្មីៗរបស់ថៃ។ ជាពិសេស ការដាក់លួសបន្លាថ្មីៗនេះដោយកាត់យកភូមិ បណ្តេញប្រជាជនកម្ពុជាពីផ្ទះសម្បែងរបស់ខ្លួនដែលរស់នៅយូរមកហើយ និងបំផ្លាញផ្ទះសម្បែងរបស់គាត់ជាដើម។

ទន្ទឹមនោះផងដែរ ឯកឧត្តម ជុំ សុន្ទរី បានថ្លែងបញ្ជាក់ថា ឯកឧត្តម ឯកអគ្គរាជទូត ក៏បានលើកឡើងបន្ថែមថា កម្ពុជាមិនបានប្រើប្រាស់មីនថ្មីៗ ដូចការចោទប្រកាន់ដោយភាគីថៃនោះទេ។ មីននៅកម្ពុជា គឺជាមីនចាស់ដែលសល់ពីសង្គ្រាមស៊ីវិលនៅកម្ពុជា ហើយកម្ពុជា ក៏បានពន្យល់ទៅស្ថាប័នអង្គការសហប្រជាជាតិ (អ.ស.ប) ពាក់ព័ន្ធរួចហើយដែរ នៅក្នុងនោះឯកឧត្តមឯកអគ្គរាជទូត ក៏បានប្រគល់ជូនឯកឧត្តម អគ្គលេខាធិការអង្គការសហប្រជាជាតិ(អ.ស.ប) នូវរូបថតនៃការដាក់រាយបន្លាលួសរបស់ទាហានថៃ កាត់ភូមិអ្នកស្រុកកម្ពុជា និងរូបថតពន្យល់ពីមីនចាស់ និងមីនថ្មីដែលធ្វើដោយ CMAC៕