សម្តេចធិបតី ហ៊ុន ម៉ាណែត ជំរុញការពង្រឹងអភិបាលកិច្ចនៃការគ្រប់គ្រងនៅតាមគ្រឹះស្ថានសិក្សា
សម្តេចធិបតី ហ៊ុន ម៉ាណែត ជំរុញការពង្រឹងអភិបាលកិច្ចនៃការគ្រប់គ្រងនៅតាមគ្រឹះស្ថានសិក្សា
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានជំរុញឱ្យមានការពង្រឹងអភិបាលកិច្ចនៃការគ្រប់គ្រងនៅតាមគ្រឹះស្ថានសិក្សា ដោយផ្តោតការយកចិត្តទុកដាក់ទៅលើការជ្រើសរើសនាយកសាលារៀន ដែលមានសមត្ថភាពក្នុងការដឹកនាំសាលារៀនឆ្ពោះទៅរកគុណភាព។
សម្តេចធិបតី ហ៊ុន ម៉ាណែត បានថ្លែងដូចនេះនៅព្រឹកថ្ងៃទី៥ ខែតុលា ឆ្នាំ២០២៣ ក្នុងឱកាសអញ្ជើញជាអធិបតីប្រារព្ធទិវាគ្រូបង្រៀនលើកទី២៦ ថ្ងៃ៥តុលា ក្រោមប្រធានបទ «គ្រូបង្រៀនជាសសរស្តម្ភ នៃកំណែទម្រង់សាលារៀនឆ្ពោះទៅរកឧត្តមភាព» ដែលពិធីនេះប្រព្រឹត្តទៅនៅវិទ្យាស្ថានបច្ចេកវិទ្យាកម្ពុជា រាជធានីភ្នំពេញ។
សម្តេចធិបតី ហ៊ុន ម៉ាណែត បានគូសបញ្ជាក់ថា នាយកសាលារៀនគឺជាកត្តាសំខាន់ណាស់ ព្រោះជាមជ្ឈមណ្ឌលនៃសាមគ្គីភាព ឯកភាពផ្ទៃក្នុង ហើយនាយកសាលាជះឥទ្ធិពលទៅលើបរិស្ថានសាលារៀនផងដែរ។
សម្តេចធិបតី ហ៊ុន ម៉ាណែត ក៏បានគូសបញ្ជាក់ថា ការបណ្តុះបណ្តាលនាយកសាលាគឺជារឿងចាំបាច់ ដើម្បីធានាគុណភាពនៃការអប់រំ និងគុណភាពនៃការគ្រប់គ្រងសាលារៀន៕
