មន្រ្តីជំនាញ ក.ប.ប. ចាប់ផ្តើមចុះត្រួតពិនិត្យទំនិញនានាក្នុងឱកាសបុណ្យចូលឆ្នាំថ្មី

មន្រ្តីជំនាញ ក.ប.ប. ចាប់ផ្តើមចុះត្រួតពិនិត្យទំនិញនានាក្នុងឱកាសបុណ្យចូលឆ្នាំថ្មី

មន្រ្តីជំនាញអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) នៃក្រសួងពាណិជ្ជកម្ម សហការជាមួយមន្ទីរពាណិជ្ជកម្មរាជធានីភ្នំពេញ និងគណៈកម្មការផ្សារធំថ្មី នៅព្រឹកថ្ងៃទី១០ មេសា ឆ្នាំ២០២៤នេះ បានចុះត្រួតពិនិត្យមុខទំនិញនានា និងយកសំណាកគំរូ ដើម្បីយកធ្វើតេស្តបឋមនៅលើរថយន្តមន្ទីរពិសោធន៍ចល័តផ្នែកម្ហូបអាហារ ដើម្បីស្វែងរក ក៏ដូចជាការពារក្រែងមានការលាយសារធាតុគីមីហាមឃាត់នានា ដែលអាចបណ្តាលឲ្យគ្រោះថ្នាក់ដល់សុខភាពអ្នកប្រើប្រាស់ និងអ្នកទទួលទាន។

លោក ហេង មាលី ប្រធានសាខាអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) រាជធានីភ្នំពេញ ក្នុងអំឡុងចុះត្រួតពិនិត្យមុខទំនិញថ្ងៃនេះ បានមានប្រសាសន៍ប្រាប់ព័ត៌មាន ប៊ីធីវី ថា ដើម្បីការពារផលប្រយោជន៍អ្នកប្រើប្រាស់ ក៏ដូចជាការការពារសុខុមាលភាពប្រជាពលរដ្ឋ ជាពិសេសនារដូវពិធីបុណ្យចូលឆ្នាំប្រពៃណីជាតិខ្មែរ ត្រូវបានលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានផ្តោតការយកចិត្តទុកដាក់ខ្ពស់ បានណែនាំជាប្រចាំ និងចង្អុលបង្ហាញដល់ឯកឧត្តម ផាន អូន ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃអគ្គនាយកដ្ឋាន ក.ប.ប. ដែលជាសេនាធិការ ពង្រឹងឱ្យខានតែបាននូវការត្រួតពិនិត្យជាប្រចាំ និងនៅទូទាំងប្រទេស។

លោកប្រធាន បានបន្ថែមថា ទាក់ទិនងការងារនេះដែរ មន្រ្តី ក.ប.ប រាជធានី ខេត្ត តែងតែចុះត្រួតពិនិត្យជាប្រចាំ ចំពោះទំនិញគ្រប់ប្រភេទដាក់លក់នៅតាមទីផ្សារ និងទីតាំងអាជីវកម្មម្ហូបអាហារនៅគោលដៅផ្សេងៗគ្នា ដើម្បីធានាការពារនូវការចរាចរលក់នូវទំនិញដែលមិនមានអនុលោមភាព ជាទំនិញដែលខូចគុណភាព និងហួសកាលបរិច្ឆេទ ដែលធ្វើឱ្យប៉ះពាល់ដល់សុខភាពអ្នកប្រើប្រាស់ ក៏ដូចជាការពារសិទ្ធិរបស់អ្នកប្រើប្រាស់ជាដើម។

ជាមួយគ្នានេះ ក្រុមអាជីវករ បានបង្ហាញការគាំទ្រចំពោះសកម្មភាពការងារខាងលើនេះ ហើយក៏ចង់ឃើញវិធានការរបស់ មន្ត្រី ក.ប.ប.និងការចូលរួមរបស់អាជីវករទូទាំងប្រទេស ក្នុងការទប់ស្កាត់ទំនិញមិនអនុលោម ដើម្បីសុខសុវត្ថិភាពអ្នកប្រើប្រាស់ក្រោយឱកាសចូលឆ្នាំថ្មីផងដែរ ដោយលើកទឹកចិត្តដល់អ្នកប្រើប្រាស់ផ្ទាល់ឱ្យចេះពិនិត្យ និងមានការប្រុងប្រយ័ត្នដោយខ្លួនឯង។

សូមបញ្ជាក់ផងដែរថា ក្នុងការងារចុះត្រួតពិនិត្យទំនិញក្នុងរដូវបុណ្យចូលឆ្នាំប្រពៃណីជាតិខ្មែរនេះ មន្ត្រីជំនាញ ក៏បានពន្យល់ អប់រំ ណែនាំ ដល់ក្រុមអាជីវករ អ្នកចែកចាយ លក់ដុំ លក់រាយ ត្រូវមានឯកសារពាក់ព័ន្ធច្បាស់លាស់ជាមុនសិន មុននឹងទទួលទិញយកមកលក់បន្ត ហើយកុំលាយបន្ថែមនូវសារធាតុគីមីហាមឃាត់ណាមួយ ដែលមិនមានបទប្បញ្ញត្តិបច្ចេកទេស​ទៅលើផលិតផលម្ហូបអាហារ ដែលនាំឱ្យប៉ះពាល់ដល់សុខភាព សុវត្ថិភាពអ្នកប្រើប្រាស់ និងបានបន្តណែនាំដល់ អាជីវករទាំងអស់ ឱ្យដាក់តាំងលក់ផលិតផលទំនិញ​ឱ្យត្រូវតាមលក្ខណៈ បច្ចេកទេស ដោយញែកដាច់ចេញពីគ្នា រវាងផលិតផលប្រើប្រាស់ដែលជាសារធាតុគីមី និងទំនិញម្ហូបអាហារ និងការពិនិត្យមើលផលិតផលហួសកាលបរិច្ឆេទជាដើម៕ អត្ថបទ ឈិត បូរ៉ាវី

ប្រភពព័ត៌មាន ៖ BTV News