សម្តេចតេជោ ហ៊ុន សែន បង្ហាញពីមោទនភាពជាមួយនឹងអ្វីដែលកម្ពុជាមាន

សម្តេចតេជោ ហ៊ុន សែន បង្ហាញពីមោទនភាពជាមួយនឹងអ្វីដែលកម្ពុជាមាន

សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាបានថ្លែងថា សម្តេចបានដាក់ចេញយុទ្ធសាស្រ្តត្រីកោណមានមុំ៣ពេលដែលសម្តេចនៅដឹកនាំប្រទេសដោយមុំទី១គឺធ្វើសតិភាវូបនីយកម្មផ្ទៃក្នុងតាមរយៈការពង្រឹងសន្តិភាពកុំឱ្យប្រទេសកម្ពុជាកើតសង្រ្គាមឡើងវិញ។

សម្តេចតេជោ ហ៊ុន សែន បានថ្លែងបញ្ជាក់ថា កាលពីឆ្នាំ២០១០ សម្តេចបានប្រាប់ឯកឧត្តមអគ្គលេខាធិការអង្គការសហប្រជាជាតិថា សម្តេចសុខចិត្តអោយតុលាការកូនកាត់បរាជ័យ ប៉ុន្តែមិនឲ្យប្រទេសកើតសង្រ្គាមឡើងវិញទេ ព្រោះការកើតសង្រ្គាមឡើងវិញមិនមែនជាការចង់បានរបស់ប្រទេសកម្ពុជាដែលត្រូវស្លាប់មនុស្សរាប់ម៉ឺននាក់នោះឡើយ។ ដូច្នេះហើយបានជាសម្តេចតេជោមានមោទនភាពជាមួយអ្វីដែលកម្ពុជាមាន។ ជាក់ស្ដែងខណៈពេលដែលហ្វីលីពីនចាប់អតីតប្រធានាធិបតីហ្វីលីពីនបញ្ជូនទៅឲ្យប្រទេសក្រៅកាត់ទោស កម្ពុជានៅរក្សាបាននូវសិទ្ធិអំណាចរបស់ខ្លួននៅក្នុងក្របខណ្ឌតុលាការកូនកាត់ដដែល។

សម្តេចតេជោ ហ៊ុន សែន បានថ្លែងបន្តថា សម្តេចបានការពារឥស្សរជនជាច្រើនរូបដែលត្រូវចោទប្រកាន់រួមទាំងសម្តេចព្រះនរោត្តមសីហនុ ព្រះបរមរតនកោដ្ឋផង ដែលត្រូវបានតុលាការកោះហៅ ដោយសម្តេចសុខចិត្តអោយតុលាការកូនកាត់នេះបរាជ័យដើម្បីកុំអោយប្រទេសមានសង្រ្គាម។ ឥឡូវនេះតុលាការកូនកាត់បានបញ្ចប់ ហើយសន្តិភាពនៅតែត្រូវបានរក្សា។

សម្តេចតេជោ ហ៊ុន សែន បានថ្លែងបែបនេះនៅក្នុងឱកាសអញ្ជើញចូលរួមពិធី «ពិសារភោជនាហារសាមគ្គីនៃគ្រួសារសមាគមឧកញ៉ាកម្ពុជា» នៅល្ងាចថ្ងៃទី១៤ ខែមីនា ឆ្នាំ២០២៥៕