រដ្ឋបាលខេត្តសៀមរាប បានបញ្ជាក់ថា ពុំមានការប្ដូរឈ្មោះសួនព្រះរាជដំណាក់ខេត្តសៀមរាប នោះទេ

រដ្ឋបាលខេត្តសៀមរាប បានបញ្ជាក់ថា ពុំមានការប្ដូរឈ្មោះសួនព្រះរាជដំណាក់ខេត្តសៀមរាប នោះទេ

រដ្ឋបាលខេត្តសៀមរាប បានចេញសេចក្តីបំភ្លឺព័ត៌មាននៅថ្ងៃទី ១២ ខែកុម្ភះ ឆ្នាំ២០២៥ ថា រយៈពេលប៉ុន្មានថ្ងៃកន្លងមក មានសាធារណជនមួយចំនួនបានបញ្ចេញមតិយោបល់ជាច្រើន តាមបណ្ដាញ-សង្គមថា មានការប្ដូរឈ្មោះសួនព្រះរាជដំណាក់ខេត្តសៀមរាប។ ពាក់ព័ន្ធនឹងករណីនេះ រដ្ឋបាលខេត្ត បានបញ្ជាក់ថា ពុំមានការប្ដូរឈ្មោះសួនព្រះរាជដំណាក់ នោះឡើយ ពីព្រោះសួនព្រះរាជដំណាក់ ត្រូវបានក្រសួងព្រះបរមរាជវាំងរៀបចំរចនាបថកែលម្អ អមដោយ រូបចម្លាក់មេទ័ពទាំង១២ កាលពីជំនាន់មុន និងព្រះវិហារព្រះអង្គចេកព្រះអង្គចម ដែលបានរៀបចំធ្វើរបងព័ទ្ធជុំវិញរួចរាល់ជាស្ថាពរកាលពីខែតុលា ឆ្នាំ២០២២ កន្លងទៅ ហើយបរិវេណទាំងអស់ដែលស្ថិតនៅក្នុងរបង គឺជាកម្មសិទ្ធិរបស់ព្រះរាជដំណាក់ ដោយពុំមានជនណាអាចប៉ះពាល់បានឡើយ។ 

ចំពោះសួនផ្សេងៗទៀត ដែលមិនស្ថិតនៅក្នុងរបងគឺជាសួនពុំទាន់មានឈ្មោះផ្លូវការនៅឡើយទេ ដែលប្រជាពលរដ្ឋនិយមហៅថា សួនបឹងកាឡូ ឬសួនហ្គ្រែនហូថល។ ពាក់ព័ន្ធនឹងសួនតេជោសន្តិភាព សម្តេចតេជោ ហ៊ុន សែន ប្រធានព្រឹទ្ធសភា បានណែនាំ និងផ្តល់ជាអនុសាសន៍ដល់រដ្ឋបាលខេត្តថា “សួនតេជោសន្តិភាព” គួរបានសិក្សាទីតាំងមួយដែលធំទូលាយក្នុងការរៀបចំសាងសង់ដែលស្ថិតនៅក្នុងក្រុងសៀមរាប ដើម្បីដាក់បង្ហាញពីប្រវត្តិនៃការបញ្ចប់សង្គ្រាមនៅកម្ពុជា ដែលធ្វើឱ្យប្រទេសយើងមានសុខសន្តិភាពមកដល់ថ្ងៃនេះ។ 

ទន្ទឹមនឹងនេះ រដ្ឋបាលខេត្តសៀមរាប ត្រូវរៀបចំកែលម្អសោភ័ណភាពនៃសួនទាំងអស់ដែលនៅជុំវិញសួនព្រះរាជដំណាក់ (ដែលប្រជាពលរដ្ឋនិយមហៅថា សួនបឹងកាឡូ ឬសួនហ្គ្រែនហូថែល) ឱ្យកាន់តែស្រស់ស្អាត ដើម្បីលើកកម្ពស់កិត្យានុភាពអង្គព្រះមហាក្សត្រ ជាទីគោរពសក្ការៈនៃយើងទាំងអស់គ្នា។ បន្ថែមលើសពីការកែលម្អ   ដើម្បីបង្កើតភាពទាក់ទាញសម្រាប់ភ្ញៀវជាតិ និងអន្តរជាតិ ការរៀបចំសួន ក៏ត្រូវមានកន្លែងសម្រាប់ប្រជាពលរដ្ឋអាចហាត់ប្រាណបានច្រើន និងសម្រាប់ប្រារព្ធកម្មវិធីល្អៗជាច្រើនដែលនឹងផ្តល់ផលប្រយោជន៍ដល់បងប្អូនប្រជាជនខេត្តសៀមរាបផងដែរ៕