សម្ដេចកិត្តិសង្គហបណ្ឌិត ម៉ែន សំអន បើកកិច្ចប្រជុំបូកសរុបលទ្ធផលការងារប្រចាំឆ្នាំ២០២៣ និងលើកទិសដៅការងារបន្ត របស់គណៈចលនាមហាជននៃគណៈកម្មាធិការកណ្ដាលគណបក្សប្រជាជនកម្ពុជា

សម្ដេចកិត្តិសង្គហបណ្ឌិត ម៉ែន សំអន បើកកិច្ចប្រជុំបូកសរុបលទ្ធផលការងារប្រចាំឆ្នាំ២០២៣ និងលើកទិសដៅការងារបន្ត របស់គណៈចលនាមហាជននៃគណៈកម្មាធិការកណ្ដាលគណបក្សប្រជាជនកម្ពុជា

(ភ្នំពេញ)៖ សម្ដេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា និងជាប្រធានគណៈចលនាមហាជន នៅព្រឹកថ្ងៃទី២១ ខែមីនា ឆ្នាំ២០២៤នេះ បានអញ្ជើញជាអធិបតីភាព បើកកិច្ចប្រជុំបូកសរុបលទ្ធផលការងារប្រចាំឆ្នាំ២០២៣ និងលើកទិសដៅការងារបន្ត របស់គណៈចលនាមហាជននៃគណៈកម្មាធិការកណ្ដាលគណបក្សប្រជាជនកម្ពុជា។

កិច្ចប្រជុំនេះមានវត្តចូលរួមមានសំណាក់សមាជិក សមាជិកា គណៈអចិន្រ្តៃយ៍ គណៈកម្មាធិការកណ្តាល សមាជិក សមាជិកា គណៈចលនាមហាជន អគ្គលេខាធិការ អគ្គលេខាធិការរង និងក្រុមការងារចំណុះអគ្គលេខាធិការដ្ឋានប្រមាណ ៥០រូប។

នាឱកាសនោះដែរ លោក នួន ផារ័ត្ន អគ្គលេខាធិការរងនៃគណៈចលនាមហាជនបានធ្វើរបាយការណ៍អំពីសមិទ្ធផលនានាដែលសម្រេចបានដោយគណៈចលនាជំនាញទាំង៤ របស់គណៈចលនាមហាជនដោយក្នុងនោះរួមមាន៖ គណៈចលនាយុវជន គណៈចលនាស្រ្តី គណៈចលនាសហជីព គណៈចលនាអង្គការ សមាគមន៍ និងដៃគូរអភិវឌ្ឍន៍ ដែលកន្លងមកបានខិតខំប្រឹងប្រែងបំពេញការងារយ៉ាងសកម្មក្នុងការដឹកនាំ តម្រង់ទិស និងសម្របសម្រួលជាប្រចាំ ជាមួយរចនាសម្ព័ន្ធចាត់តាំងតាមក្រសួង-ស្ថាប័ន រាជធានី-ខេត្ត ក្នុងការតាមដាន គាំទ្រ និងអនុវត្តយ៉ាងម៉ត់ចត់នូវវិធានការ និងអនុសាសន៍នានារបស់សម្តេចតេជោ ហ៊ុន សែន ប្រធានគណបក្ស។

ជាមួយគ្នានេះដែរ អគ្គលេខាធិការដ្ឋានបានបន្តតាមដាន ស្វែងយល់អំពី បញ្ហាប្រឈម សភាពការណ៍ និង សតិអារម្មណ៍មហាជន តាមរាជធានី-ខេត្តជាប្រចាំ ដើម្បីឱ្យការអនុវត្តការងារកាន់តែប្រសើរឡើងស្របតាមទិសដៅឆ្ពោះទៅមុខរបស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី។

គួរបញ្ជាក់ដែរកិច្ចប្រជុំនេះ បានរៀបចំឡើងក្នុងគោលបំណងបូកសរុបលទ្ធផលការងារសំខាន់ៗ ក្នុងឆ្នាំ២០២៣កន្លងទៅ ព្រមទាំងកំណត់នូវការវាយតម្លៃជារួម ទៅលើបញ្ហាប្រឈម សំណូមពរ និងទិសដៅការងារបន្ត សំដៅចូលរួមគាំទ្រដល់ការដឹកនាំរបស់គណបក្ស និងរាជរដ្ឋាភិបាល ក្នុងការបម្រើជាតិ មាតុភូមិ និងប្រជាជន៕

ប្រភពអត្ថបទ ៖ Fresh news